مدينة عاشقة الظلام
مدينة عاشقة الظلام
شجر الخريف حزين
قلبه اللي اتحرق
بكي الدموع ورق
ورد الربيع دبلان
فوق العيدان
كما شبه المسيح مصلوب
يا ليل له قلب أبيض
صابه النهارده الجنون
بقي وحش كاسر
ع الخلق ثاير
بلا نجمة بلا رحمة
بلا قمرة بلا عيون
كل شيئ النهارده حزين
حتي ساعات اليوم خطوتها تقيلة
تقل هلب السفين
الحزن ف عين الخلق
بايت من امبارح
وحالف مايمشي
ناس بتدق كفوف العجب
مجزوم بيهذي الحكمة
لسه تور الساقية داير بلا عيون
لسه نهر الحب دايب
في بحور الدم
لسه الغريب غريب مرجعش
لسه النصيب عصيب منصفش
ولسه الديمقراطية
لابسه شال الحزن الاسود
لسه راسها ف حجر الجلابية
قدام الجوامع مدبوح الحمام
كل شيئ النهارده حزين
بلا معني بلا لون
حزين علي فتي الفتيان
فتي كفيف .. قلبه جرئ
قدمه الخفيف .. هلك الطريق
كل يوم بعد الآذان
في العشا يتلمو الجيران
بالحب يحاوطو الفتي
يزغزغو برد الشتا
والفتي فيهم خطيب
حامي حمي الحق
بس أه من ديدبان
بيسمع ده الكلام
قلبه العفي ينشق
بصرخة قوية
ف شلة زبانية
من شداد البطاشين
ودخول اتنين علي اوله
تقول عتاوله
من كبار الهجامين
في زحف المعتدين جايين
يدقو زار النهار
الظلم إن فاق الحدود
سوس بينخر في الوجود
السكون له صوت رهيب
والنحيب بيخربش ع الحيطان
ألف غنوة لديدبان
رنت في الودان
وف ثواني .. ماتت معاني
زفوه ف أساور حديد
وطابور عساكر
وقولة ياعيني ويا آه
ضاع الفتي وهو كفيف
عيون مثبتة و ع الرصيف
بقايا بشر
أكم همس جهر
لها بحقها
عشان ماتصحي وعن نفسها
تنفض غبار الظلم
كان بيصرخ يا محمد
كان بيسأل فين يسوع
كان في صوته رنه
تسمعها الضلوع
تدوب الضلوع ف الضلوع
يقول يا رب البنايين
من عبيدك هدادين
جلادين مالها دين
رقد الشيخ ف نهاية الرحلة
اتحمل وهو كفيف
اللي ميطيقوش البشر
ده لوكان جبل
كان انفتل رمله
يبعترها الهوا علي كل مكان
زنزانته كلها حيطان
وهياكل الخلق اللي فيها اتفنت
راقده جنبه في سلام
تاني يوم طلع النهار دبلان
زي فلاية بلا رحيق
عند مولانا متفرقش
الصبح بيزق الليل
لجل يوسع له مكان
الشيخ بيدندن غنوة حق
ياللي عجنته الظلم بدم الخلق
وخبزتوه عيش
قولنا غيره ..
قولته مفيش
عيشكو يا با شا ميلزمنيش
أنا حر ودمي حر
أنا لواشوف المر
ما أعرف اوطي الخد
مااعرف بوس اليد
جري إيه يا ديابه
إنتي عني ماسمعتيش
ده أنا لوانتني
عود الحديد
ماانتنيش
ويقول الديدبان اللي رايح جاي
لسه فيك روح
ياخي اتلم وبطل نوح
شفتوش مدينة عاشقة الضلام
مدينتنا كده
شفتوس مدينة كارهه الصباح
مدينتنا كده
بتقولو محناش
طب ليه ساكتين
وانتم ملايين
ده انتم لوكنتم
طير له طنين
كان صوتكم دوب جبل الوهم
زلزل عرش الخوف
سوي مملكة الظلم
بتراب الارض
ديدبان ورا ديدبان
ارجع علي ف مخك
زمانا عايز كده
تمثال الضمير انشرخ
مثال الحق قال ياهوه
قام في الناس وصرخ
انجدو نفسكم لوتنجدوه
يابلد ضاع منها الدليل
الطريق لساه طويل
وانتو لسه مخطيتوش
مشواركو فوق الالف ميل
ابدءو الخطي متخافوش
لو تعرفو إنكم عتاد عتيد
قوة لو دبت الارض
تحفرو بحر جديد
يا عدل يا مهر ابيض
يا حصان ماله زيّ
ياللي صدرك أعرض
من ليل سواده نيّ
اجري إملا البراري
اطويها طيَّ
سامعة يا صابحة
ده خطوة النهار اللي حاملة الضي
بعيدة وخفيفة
بس بتقول جاية وجيَّ
قومي شدي
طرف شال الصباح
علي طول هييجي
ويزيل .. غيام اللـــــــــــــــــيل
************************************
